الهدف من هذا ليس الدفاع عن من قام بتعذيب مواطنين فكل واحد له حق الدفاع عن نفسه و لكن فى هذه الأيام تكاثر الحديث عن النائب العام و تباطئه فى محاسبة الفاسدين إلخ…. و بصراحة انا من الناس اللى كانت مع تغيير النائب العام بحجة البطىء و إنه كان من النظام السابق و لكن الصدفة خلتنى اكلم الأستاذ حسن محمد شال, 27 سنة, معيد بقسم الفيزياء بالجامعة الأمريكية حيث إنه على علاقة صداقة قوية بالمستشار محمد النجار رئيس نيابة الأموال العامة اللى قال المرافعة الجبارة فى جلسة محاكمة أحمد المغربى، وزير الإسكان السابق، وعهدى فضلى، رئيس مؤسسة أخبار اليوم السابق، ورجلى الأعمال الهاربين ياسين منصور ووحيد متولى اللى وصل لدرجة إن الدكتور بهاء الدين ابو شقة اعلن انه هيتقدم بشكوى لوزير العدل و النائب العام بسبب المرافعة. الكلام اللى اتقال كان زى التويت دى و انا مش بعارض اللى قال كدة عشان انا كنت مقتنع بالكلام دة لحد يومين فاتو
و حكى لي الأستاذ حسن عن مرة كان فيها فى مكتب المستشار محمد النجار و كان ناس هناك مقدمين اوراق تتهم المغربى فى قضايا فساد و جلس المستشار يراجع الأوراق كذا مرة حتى يتأكد ان القضية سليمة و بعدين دخل عليهم النائب العام المستشار عبدالمجيد محمود الساعة 9.30 مسائاً و اللى حصل زى ماقالى كان كالتالى نقلاً عنه بدون تغيير اى حرف:
اتكلمت مع النائب العام شوية وقلت له يا سيادة النائب ارجوك انا عارف انك نزيه جدا، واشرف من الشرف، وكنت عارف ان كان فيه تهديدات وحاجات بتوصل لكم بانهاء التحقيقات وإلا ممكن يصفوكم وكفاية قضية هايديلينا والقاضي اللي اتقتل بعدها وعيلته اتبهدلت. ياسيادة النائب ارجوك ماتخافش تاني، انا سايب الناس في التحرير لو قلتلهم يروحو يجيبو مبارك من قفاه في شرم مش هايترددوا ابدا و كلنا هنموت فداك فى مقابل انك متخذلناش عايزين الحقيقة و العدل و بس. و بعد كدة الراجل اخدنى بالحضن و بكى و دعا لكل اللى فالتحرير بالخير و قال للمستشار محمد خلاص يا محمد بيه زمن الخوف راح و شوف شغلك عادى خالص.
و حضر حسن المحاكمة و الجزء اللى اتنشر من المرافعة حيث بدأ المستشار محمد النجار ب« فلا تحسبن الله غافلاً عما يفعل الظالمون»، وقال «هذه بشارة للمتهمين فى الآخرة، أما حساب الدنيا فهو اليوم»، وتابع «لماذا: خنتم أمانتكم، وجعلتمونا نتقاتل على كسرة الخبز وأفقرتمونا وحرمتمونا من شربة ماء، وأسكنتمونا القبور أحياء وأقمتم لأنفسكم المنتجعات وأثقلتم ظهورنا بالضرائب وأفقدتمونا الأمل فى المستقبل، فأقدم بعضنا على الموت انتحاراً أو غرقاً أو حرقاً؟» و كمل حسن و قاللى “فضح كل حاجة، وجاب سيرة حاجات قال انا معنديش ورق عليها عشان اوجه بيها تهم، وقالك صفوت بيقول عنده بس حتة ارض والناس بترمي الزبالة فيها، وزكريا و فتحي، وحسبي الله ونعم الوكيل، ودعى على الظلمة كلهم والناس رددت وراه آمين” و من كتر مالناس سقفت القاضى اتضايق و قال إنه ممكن يخلى 15 واحد بس و الباقى يطلعوا.
و يكمل حسن إن بعد الجلسة ماخلصت المستشار قاله يارب زمايلك فالتحرير ميبقوش زعلانين مننا و والله القضاء معاهم و المشكلة مش فالقضاء المشكلة فالإجرائات و القوانين اللى محطوطة على القضاء قبل الشعب و إن البطىء من مصلحة الشعب لإن لو غلطة صغيرة ممكن تبوظ قضية كبيرة و يبقى منظر القضاء وحش إنه معرفش يحاكم الناس اللى معروف إنهم مشتركين فالفساد
و لتأكيد الكلام دة ممكن تشوفوا القضايا اللى تم فتحها من جديد زى قضية رشوة مرسيدس و كمان قضية محمد إبراهيم سليمان و ممكن تشوف التهم اللى اتوجهت ليه سنة 2008 من هنا و خرج برائة و لما اتقبض عليه حصل الآتى و الكلام جالى من حسن كان :
بخصوص محمد ابراهيم سليمان: لما مسكوه المرة دي، المستشار محمد بيقوله يعني انت ماهربتش ليه؟ قاله سليمان: واهرب ليه؟ انا ماعلياش حاجة
المستشار محمد قاله: تصدق البجاحة ليها ناسها! اوعى تكون فاكر ان اللي طلعك المرة اللي فاتت هايطلعك المرة دي
و فالنهاية احب اقول إنى واثق مليون فالمية إن النيابة شايفة شغلها على أكمل وجه و هناك تفاصيل كتير هتتكشف مع الوقت و لا أعلم إذا كان من الممكن الكتابة عنها الآن أم لا و لكنى أؤكد أن المستشار عبد المجيد محمود و محمد النجار من حماه الوطن الصامدين ضد الفساد و أرجو من كل قارىء أن يعلم من لا يعلم حتى تتضح الصورة و نعطيهم الفرصة كى نتخلص من الفاسدين.
Via @MinaNaguib90
No comments:
Post a Comment